KOSOVË- Kombëtarja e Kosovës e futbollit është vetëm një ndeshje larg historisë, pasi përballet me Kombëtaren e Turqisë në finalen e play-off-it për FIFA World Cup 2026. Ndeshja zhvillohet në stadiumin “Fadil Vokrri” dhe pritet të jetë një sfidë e fortë, me shumë emocion për tifozët kosovarë.
Pas fitores dramatike 4-3 ndaj Sllovakisë, Kosova shkon në këtë sfidë me moral të lartë dhe përkrahjen e publikut vendas.
Ekspertët vlerësojnë se Turqia është favorite sipas statistikave dhe koeficientëve të basteve, me rreth 55-60% mundësi për fitore, ndërsa Kosova ka 20-25% shanse, duke llogaritur edhe mundësinë e barazimit që mund të dërgojë ndeshjen në kohë shtesë ose penallti.
Trajneri i Kosovës ka deklaruar se skuadra do të luajë me strategji të kujdesshme dhe të përqendruar në mbrojtje dhe kundërsulme, duke shfrytëzuar avantazhin e stadiumit të mbushur me tifozë. Nga ana tjetër, Turqia vjen me përvojë dhe lojtarë që aktivizohen në liga të forta evropiane, gjë që e bën sfidën edhe më të vështirë.
Kjo ndeshje konsiderohet historike për futbollin kosovar, pasi një fitore do të sigurojë debutimin e Kosovës në një Botëror, duke shënuar një moment të paharrueshëm për sportin dhe tifozët në vend.
Kryeministri i Kosovës, Albin Kurti, ka premtuar mbështetje financiare me vlerë 1 milion euro nëse Kosova mposht Turqinë dhe kualifikohet në Kupën e Botës.
“Dhe së dyti, në rast të kualifikimit në Kupën e Botës, zotohemi edhe për 1 milion euro shpërblim. Përpara Kosovë, gjithmonë me ty.”, shprehej Kurti.
Ndërkohë në sfidën me Sllovakinë, Kurti premtoi 500 mijë euro, vlerë kjo e cila do t’u shpërndahet futbollistëve pas triumfit në shifrat 3:4 në Bratislavë.
“Në fazën e radhës hyjmë me plot vetëbesim, besimin tonë në ta po e shprehim me zotimin tonë për ta. Së pari në rast të fitores ndaj Sllovakisë, zotohemi për shpërblim në vlerë prej 500 mijë eurove”, premtoi Kurti./ALBSTORY
